Sú mynd sem dregin er af skuldum mínum við íslenska banka í skýrslu rannsóknarnefndar Alþingis er röng. Ýmsar upplýsingar sem settar eru fram eru rangar og aðrar eru villandi. Helst reynir rannsóknarnefndin að telja til minna skulda ýmsar skuldir félaga sem ég hafði lítið sem ekkert með að gera og átti lítið í. Sú aðferð rannsóknarnefndarinnar að telja það til minna skulda byggir hvorki á lagastoðum né venjum. Skuldir fyrirtækja sem ég leiddi voru að sönnu miklar og í rauninni of miklar eins og ég hef sjálfur viðurkennt. Ástæðulaust er hins vegar af rannsóknarnefndinni að bæta við þær skuldum sem ég efndi hvorki til né bar beina ábyrgð á.

DV heldur uppteknum hætti með skrif sín af málefnum sem tengjast kaupum á tölvuleikjaframleiðandanum CCP. Blaðið hefur að vísu þurft að leiðrétta fyrstu skrif sín, en heldur áfram að reyna að gera viðskiptin tortryggileg. Nú notar blaðið það ráð að hrópa um „innherjaupplýsingar“ og lítur þar framhjá þeirri staðreynd að félagið var alls ekki skráð á markaði. Lakari gerist viðskiptablaðamennskan varla.

Fullyrðingar fréttamanna RÚV í gær um lánaafgreiðslu Landsbankans til Samsonar eignarhaldsfélags ehf. eftir að bankinn var fallinn styðjast ekki við staðreyndir máls. Öll þau lán sem fjallað er um í fundargerð lánanefndar bankans  9. október 2008 og RÚV gerir að umfjöllunarefni voru afgreidd út úr bankanum mánuðum og árum áður. Þær ákvarðanir sem þarna eru færðar til bókar varða breytingar á ábyrgðum vegna gamalla lána og voru þær teknar fyrir hrun fyrirtækjanna.  Rétt er að taka fram, að RÚV leitaði engra skýringa hjá aðstandendum Samsonar við undirbúning þessara frétta og öll þau mál sem tilgreind eru hafa verið tíunduð áður í fréttum og í skýrslu rannsóknarnefndar Alþingis. Ekkert nýtt hefur komið fram, þótt nú sé reynt að bera vínið fram á nýjum belgjum.

Í rannsókn þar sem Creditinfo kannaði umfjöllun íslenskra prentmiðla fyrstu 12 mánuðina eftir hrun bankanna um nokkra nafngreinda einstaklinga sem voru í forystu fjármálafyrirtækja í aðdraganda þess kemur í ljós að DV fjallar hlutfallslega meira um einstaklinga sem tengdust Landsbankanum, þ.e. Björgólf Guðmundsson, mig – Björgólf Thor Björgólfsson og Sigurjón Þ. Árnason bankastjóra, en einstaklinga sem tengdust öðrum bönkum. Ef niðurstöður eru bornar saman við umfjöllun fjölmiðla eftir birtingu skýrslu rannsóknarnefndar Alþingi á orsökum hrunsins í apríl 2010 sést að umfjöllun um Landsbankamenn minnkaði verulega hlutfallslega. Þá er áberandi að Morgunblaðið fjallar hlutfallslega meira um Jón Ásgeir Jóhannesson en aðra þá sem mest voru í umræðunni eftir hrun. Hafa ber í huga að nýr ritstjóri, Davíð Oddsson, kom ekki að Morgunblaðinu fyrr en í lok þess tímabils sem prentmiðlarnir voru skoðaðir.