Fréttablaðið fjallar minnst um Jón Ásgeir og Pálma Haraldsson

Í athugun þessari, sem var framkvæmd að minni ósk, kannaði Creditinfo umfjöllun prentmiðla frá því snemma í  mars 2010 og allt fram í aðra viku september eða í slétta 6 mánuði. Rétt er að geta þess að ályktanir þær sem dregnar eru af tölulegum niðurstöðum rannsóknar Creditinfo eru mínar. Mikilvægt er að hafa í huga að á þessu tímabili birtist skýrsla rannsóknarnefndar Alþingis og embætti sérstaks saksóknara í málum tengdum hruninu greip til opinberra aðgerða við rannsókn mála sem tengjast Kaupþingi.

Íslenskir prentmiðlar fjalla langmest um Jón Ásgeir Jóhannesson. Samtals birtust 413 greinar um hann á tímabilinu, tæplega 40% þeirra birtust í DV, um 27% í Morgunblaðinu, ríflega 21% í Fréttablaðinu og um 12% í Viðskiptablaðinu. Næst mest er fjallað um mig eða í 196 skipti. Mest í DV og síðan í Fréttablaðinu en um 80% allra frétta prentmiðla um mig eru í þessum tveimur miðlum. Því næst fjalla íslenskir prentmiðlar mest um Sigurð Einarsson, Hreiðar Má Sigurðsson og Pálma Haraldsson.

Heildarfjöldi frétta:

Hlutdeild hvers prentmiðils:

Áhugavert er að skoða framlag einstakra fjölmiðla til heildarumfjöllunar um þessa fimm einstaklinga. Með samanburði koma í ljós mismunandi áherslur ritstjórnanna á hvern þessara einstaklinga. Ljóst er að DV telur málefni tengd þessum mönnum mikilvæg enda eru 36% – 43% greinanna um þá í DV sem er athyglisvert því blaðið kemur út aðeins þrisvar í viku á meðan útgáfudagar Morgunblaðs og Fréttablaðs eru fimm og Viðskiptablaðs einn.

Morgunblaðið fjallar áberandi oftar um Jón Ásgeir en aðra en með því að skoða hlutdeild hvers fjölmiðils í heildarumfjöllun sést að framlag blaðsins er rúmur fjórðungur. Þá er hlutfallsleg umfjöllun Fréttablaðsins minnst um Jón Ásgeir og Pálma Haraldsson eða rétt um 21% en hlutdeild blaðsins í umfjöllunum um mig, Sigurð Einarsson og Hreiðar Már er álíka eða frá 27% til 29%.

Eignarhald á prentmiðlum og ritstjórnir

Rétt er að hafa í huga að Jón Ásgeir Jóhannesson tengist Fréttablaðinu og útgáfufélagi þess, 365 miðlum ehf. Hann var aðaleigandi blaðsins frá 2002 og þegar blaðið sameinaðist Stöð 2 og Bylgjunni undir merkjum 365 miðla ehf. varð hann aðaleigandi þess félags. Hann var aðaleigandi félagsins þar til eiginkona hans fékk yfirráðin yfir um 90% hlut í því í framhaldi af hlutafjáraukningu í marslok 2010. Þá hafa verið sagðar fréttir af tengslum Pálma Haraldssonar við það félag. Ritstjóri Fréttablaðsins á rannsóknartímabilinu er Ólafur Stephensen. Morgunblaðið var á þessu tímabili og er enn í eigu Guðbjargar Matthíasdóttur, útgerðarmanns í Eyjum, og fleiri undir hennar forystu. Davíð Oddsson og Haraldur Johannessen voru ritstjórar blaðsins á rannsóknartímabilinu og eru enn. DV var á þessum tíma og er enn í eigu hóps fjárfesta undir forystu Lilju Skaptadóttur sem býr í Frakklandi og hluta starfsfólks.  Fram til þessa árs var DV þó í eigu Hreins Loftssonar sem verið hefur viðskiptafélagi Jóns Ásgeirs um áratugabil en ekki hefur orðið breyting á forystu ritstjórnar blaðsins en þar ráða ríkjum feðgarnir Reynir Traustason og Jón Trausti Reynisson.  Árið 2009 var  útgefandi Viðskiptablaðsins Myllusetur ehf. sem fram að hausti það ár var skráð í 100% eigu Haraldar Johannessen fyrrverandi ritstjóra blaðsins, en Pétur Árni Jónsson framkvæmdastjóri blaðsins hefur í símtali við talsmann Novators upplýst að hann eigi nú blaðið að 2/3 og Sveinn Biering Jónsson þriðjung.  Björgvin Guðmundsson var ritstjóri blaðsins á umræddu rannsóknartímabili og er enn.