BTB - Fréttir

Nánast frá blautu barnsbeini!

Wed, 22 Feb 2012 14:45:00 +0000

DV rifjar upp ýmis gömul mál frá fyrri tíð í því eintaki sem kom út í dag. Blaðið seilist hins vegar full langt inn í fortíðina þegar það lætur eins og deilur hafi risið milli mín og núverandi forstjóra Fjármálaeftirlitsins þegar ég var vart af fermingaraldri - og að enn séu væringar með okkur! Þetta er að sjálfsögðu algjör firra. Hið rétta er að ég hef aldrei hitt manninn – leiðir okkar hafa aldrei legið saman.

Rangt hjá DV – en engin leiðrétting

Mon, 13 Feb 2012 15:57:00 +0000

Það er rangt sem fram kom í DV á föstudag í frétt á bls. 4 undir fyrirsögninni „600 milljónir afskrifaðar“ að ég hafi verið eigandi eignarhaldsfélagsins AB 89 ehf. Ég átti aldrei neitt í því félagi. Ég átti heldur ekki neitt í félaginu Hansa ehf sem í fréttinni er sagt vera móðurfélag AB 89 ehf. Af þessu leiðir að undirfyrirsögn fréttarinnar um „Dótturfélag eignarhaldsfélags Björgólfsfeðga gjaldþrota“ er röng.

Uppfært 15.febrúar 2012

DV birti í morgun leiðréttingu á umræddri frétt.

Þrír samningar í höfn hjá gagnaveri

Thu, 9 Feb 2012 17:47:00 +0000

Gagnaver Verne Global í Reykjanesbæ var formlega opnað í gær. Það er mjög ánægjulegur áfangi í vegferð, sem lokið verður árið 2017 og skapar 100 störf. Í dag bættust tölvuleikjafyrirtækið CCP og sprotafyrirtækið GreenQloud í hóp viðskiptavina gagnaversins.

Allir mögulegir heimildamenn neita - Observer er að kanna málið

Thu, 26 Jan 2012 17:12:00 +0000

Nefndarmenn í rannsóknarnefnd Alþingis hafa allir lýst því yfir að þeir hafi ekki tjáð sig um efni skýrslunnar við Sigrúnu Davíðsdóttur eða breska blaðið Observer. Sigrún segist núna ekki gefa upp heimildarmenn sína. Það er fullseint, því hún hafði áður fullyrt að visku sína hefði hún frá rannsóknarnefndinni, en allir þrír nefndarmenn neita því afdráttarlaust. Þá er það rangt hjá Sigrúnu að Observer hafi ekki verið tilkynnt um svör forseta Alþingis og nefndarmanna í rannsóknarnefndinni. Upplýsingar um það voru sendar lögfræðideild blaðsins sl. föstudag. Ég fékk þau svör að blaðið væri nú að skoða málið nánar.

Engin nefnd og engar skýringar

Thu, 26 Jan 2012 10:49:00 +0000

Forseti Alþingis hefur sent mér skýrt og skilmerkilegt svar vegna spurninga minna um störf rannsóknarnefndar Alþingis og það ber að þakka. Í bréfi forseta kemur fram, að rannsóknarnefndin lét af störfum í apríl 2010, um leið og hún skilaði skýrslu sinni til Alþingis. Þá lýsa nefndarmennirnir þrír, Páll Hreinsson, Sigríður Benediktsdóttir og Tryggvi Gunnarsson, því allir yfir að þeir hafi ekkert tjáð sig við fjölmiðla um skýrsluna. Ég myndi því gjarnan vilja vita hvers vegna breska dagblaðið Observer heldur því fram að það hafi fengið tiltekin atriði í skrifum sínum haustið 2011 staðfest hjá nefndinni. Þá er ekki síður undrunarefni til hvaða „höfunda rannsóknarskýrslunnar“ Sigrún Davíðsdóttir var að vísa þegar hún tilkynnti siðanefnd Blaðamannafélags Íslands að hún hefði grennslast eftir því hjá áðurnefndum höfundum „hver réttur skilningur á umfjölluninni væri.“ Í báðum tilvikum var nefndin löngu hætt störfum og nefndarmenn hafa ekki svarað neinum fyrirspurnum.

Í tilefni af fréttaflutningi af stefnu slitastjórnar Landsbankans.

Tue, 24 Jan 2012 16:19:00 +0000

Í stefnu slitastjórnar Landsbankans á hendur stjórnendum og bankaráðsmönnum bankans er fjallað um eignarhald á bankanum. Þar er því haldið fram að Samson hafi í raun ráðið 73% í bankanum. Enginn fótur er fyrir þessum málflutningi slitastjórnarinnar, sem hefur ákveðið að krydda stefnu á hendur nokkrum einstaklingum með þessum fullyrðingum. Stefnan og sú atvikalýsing sem þar kemur fram ber með sér að stefnan er málatilbúnaður eins aðila þar sem reynt er að draga upp mynd sem þjónar hans hagsmunum. Slíkar lýsingar þurfa á engan hátt að endurspegla rétta mynd og ætti umfjöllun fjölmiðla að taka mið af því.

Lítill áhugi á framhaldslífi rannsóknarnefndar

Fri, 13 Jan 2012 12:30:00 +0000

Fjölmiðlar virðast fæstir velta því fyrir sér, hvort rannsóknarnefnd Alþingis sé enn að störfum og veiti upplýsingar þeim sem hugkvæmist að leita til hennar. Hljóta fjölmiðlar þó margir að vilja bera ýmislegt undir nefndina, fái þeir færi á. Ég upplýsti hér á þessum vef mínum í byrjun vikunnar að ég hefði óskað svara frá rannsóknarnefndinni og forseta Alþingis um störf nefndarinnar frá því í apríl 2010, þegar skýrsla hennar kom út. Ég hafði staðið í þeirri trú að nefndin hefði látið af störfum þá, en þrívegis verið fullyrt við mig að nefndin hafi veitt nánari skýringar á skýrslu sinni eða lagt blessun sína yfir útreikninga blaðamanna.

Rannsóknarnefndin enn að störfum?

Mon, 9 Jan 2012 09:38:00 +0000

Fyrir mánuði sendi ég bréf til forseta Alþingis og nefndarmanna í rannsóknarnefnd Alþingis. Í bréfinu óska ég svara um störf rannsóknarnefndarinnar frá apríl 2010. Áður hafði ég raunar staðið í þeirri trú að nefndin hefði látið af störfum í þeim mánuði, um leið og skýrsla hennar kom út. Hins vegar hafa mér þrívegis borist upplýsingar sem benda til þess að nefndin hafi veitt fyrirspyrjendum nánari skýringar á skýrslu sinni. Það er að sjálfsögðu fagnaðarefni en um leið er eðlileg krafa að skýrsluhöfundar taki tillit til þeirra athugasemda sem komið hafa fram, til dæmis hér á vefsíðu minni. Þá ítreka ég þá ósk mína að athugasemdir mínar verði birtar á vef Alþingis, þar sem rannsóknarskýrsluna sjálfa er að finna.

Gleðileg jól og farsælt komandi ár

Sat, 24 Dec 2011 14:49:00 +0000

Ég óska öllum gestum vefjarins www.btb.is og fjölskyldum þeirra og vinum gleðilegra jóla. Þá óska ég þeim sem og Íslendingum öllum farsældar á nýju ári og ég þakka samskptin á árinu sem er að líða. Á árinu 2011 sáust merki þess að hagur íslensku þjóðarinnar fer nú batnandi en jafnframt blasti við að vandinn sem hófst 2008 er að reynast mörgum nágrannaþjóðum erfiður viðureignar. En eins og gömul kínversk speki minnir okkur á þá leynast tækifæri í hættum og ógnum. Vonandi gengur okkur öllum vel á nýju ári að finna þau.

Dagblaðið Observer birtir athugasemd

Mon, 12 Dec 2011 00:00:00 +0000

Dagblaðið Observer birti í morgun athugasemd frá mér vegna skrifa þess fyrr á þessu ári. Eftir málarekstur féllst dagblaðið á að birta þessar línur þar sem ég kem til skila leiðréttingum við rangfærslur um áhættulánveitingar Landsbankans til mín. Efnislega er athugasemdin í dag samhljóða þeirri athugasemd sem birtist í síðustu viku á vefsíðu Observer.

Gamalt vín á gömlum belgjum

Thu, 8 Dec 2011 16:35:00 +0000

Viðskiptablaðið ritar að fátt sé um nýjar og bitastæðar upplýsingar í skýrslu Kroll frá 2006, en þá skýrslu gerði Kastljós RÚV að miklu umfjöllunarefni í síðustu viku. Viðskiptablaðið bendir réttilega á, að Kroll-nafnið eitt gefi slíkum fréttum vigt en segir jafnframt að skýrsla fyrirtækisins byggi að verulegu leyti á fréttum sem þegar höfðu birst í dagblöðum og tímaritum, staðfestum eða óstaðfestum.

Observer birtir athugasemd

Mon, 5 Dec 2011 15:35:00 +0000

Breska blaðið Observer hefur birt athugasemd frá mér á vefsíðu sinni, í kjölfar greinar sem blaðið birti í lok ágúst sl. og var uppfull af ósannindum og hálfsannleika. Áður hafði greininni raunar verið breytt á vefsíðunni, eftir að Observer viðurkenndi að hafa farið offari í útreikningum sínum.

Kastljósi beint að svörum

Fri, 2 Dec 2011 10:35:00 +0000

Kastljós sendi nokkrar spurningar til mín í gær, vegna umfjöllunar um gamla skýrslu. Skýrslan var unnin af fyrirtækinu Kroll að beiðni Barr Pharmaceuticals árið 2006, en þá börðust Barr og Actavis um lyfjafyrirtækið Pliva. Barr leitaði allra leiða til að fá fjárfestingarsjóði til liðs við sig, fremur en Actavis, og liður í því var samantekt á orðrómi og dylgjum, sem slúðrað hafði verið um í tengslum við bjórverksmiðju okkar félaga í Pétursborg. Þar er skautað léttilega framhjá sannleikanum, því ég hef aldrei tengst þeim mönnum sem Kroll og Kastljós ætla að hafi verið viðskiptafélagar okkar feðga þar eystra.

Skáldsaga af viðskiptum

Wed, 30 Nov 2011 18:08:00 +0000

Nýútkomin saga eftir Ingimar Hauk Ingimarsson, Sagan sem varð að segja, styðst ekki við raunveruleikann í Pétursborg á tíunda áratug síðustu aldar hvað varðar örlög og ævi fyrirtækisins Baltic Bottling Plant Ltd.(BBP). Hið rétta er að félagið var ólöglega stofnað þar sem Ingimar Haukur og félagi hans sviku um greiðslu hlutafjár. Síðan bjuggu þeir til fléttu viðskipta við aflandsfélög í þeirra eigu sem saug peninga út úr rekstri BBP. Eftir tvö erfið ár í rekstri og vanefndir og svik þeirra félaga blöstu við, ákvað Ingimar Haukur að selja fyrirtækið enda var hann þá með hugann við önnur verkefni í Pétursborg. Þegar hann fann síðan þefinn af velgengni verksmiðjunnar eftir að hann hafði selt hana reyndi hann með ýmsum hætti að teygja sig í hluta ávinningsins. Ávirðingum og aðdróttunum Ingimars Hauks verður svarað með ítarlegum hætti þegar færi hefur gefist á að fara yfir gögn þessa 17 ára gamla máls og ef tilefni þykir þá til.

Ósáttur við Thors Saga

Tue, 22 Nov 2011 10:06:00 +0000

Ég get vel skilið að frændi minn, Guðmundur Andri Thorsson sé ósáttur við myndina Thors Saga. Myndin er fjarri því að vera eins og ég hélt að hún yrði. Ég stóð í þeirri trú að áherslan yrði fyrst og fremst á langafa okkar, Thor Jensen. Hins vegar fékk ég engu ráðið um útkomuna, fremur en aðrir sem samþykktu að koma fram í myndinni.

4G og netsími hjá Nova

Wed, 16 Nov 2011 07:14:00 +0000

Símafyrirtækið Nova sem er í eigu fjárfestingafélags míns, Novators, hefur ávallt verið í fararbroddi tækninýjunga á farsímamarkaði. Fyrirtækið hefur nú, fyrst íslenskra símafyrirtækja, hafið prófanir á 4G, fjórðu kynslóð farsímanetkerfa. Þá kynnti fyrirtækið nýlega nýja þjónustu, Nova netsímann, sem virkar ekki ósvipað Skype. Hægt er að hringja úr netsímanum í öll símanúmer, innanlands og utan, en símtöl á milli tveggja Nova netsíma eru alltaf ókeypis.

Enn unnið að uppsetningu

Tue, 25 Oct 2011 15:19:00 +0000

Rúmri viku eftir að búnaði í gagnaver Verne Global var skipað upp í Helguvík er enn unnið að því að koma honum fyrir í gagnaverinu á Ásbrú. Gagnaverið tekur til starfa í byrjun næsta árs. Víkurfréttir í Reykjanesbæ fylgjast að vanda vel með gangi mála, eins og fjölmiðillinn hefur gert frá upphafi. Í gær var birt mynd á fréttavef blaðsins sem sýnir enn einn flutningabílinn flytja aðföng í gagnaverið.

Nýjum störfum skipað upp

Mon, 17 Oct 2011 11:20:00 +0000

Á vef Víkurfrétta í Reykjanesbæ er lýsandi fyrirsögn á frétt um gagnaver Verne Global: Nýjum störfum skipað upp. Þar segir frá því að undanfarið hafi verið auglýst eftir fólki til starfa við gagnaverið. Með fréttinni fylgir myndskeið, sem sýnir þegar tækjabúnaði í gagnaverið var skipað upp í Helguvík.

Svona rís gagnaver

Wed, 12 Oct 2011 16:06:00 +0000

Breska fjarskiptafyrirtækið Colt, sem útvegar búnað í gagnaver Verne Global í Reykjanesbæ, hefur látið vinna áhugavert myndband. Myndbandið útskýrir hvers vegna Colt varð fyrir valinu og gefur innsýn í hina miklu uppbyggingu, sem nú er á lokasprettinum.

Niðurtalning hafin

Fri, 30 Sep 2011 10:35:00 +0000

Uppbygging gagnavers Verne Global á Suðurnesjum gengur vel. Í vikunni var skýrt frá því að breska fjarskiptafyrirtækið Colt muni flytja allan búnað í gagnaverið til landsins og að gert sé ráð fyrir að það geti tekið til starfa eftir fjóra mánuði. Colt hefur sett upp sérstakan teljara, sem telur niður dagana fram að lokum verksins.

Dagens Næringsliv fer yfir stöðuna

Sat, 24 Sep 2011 00:00:00 +0000

Ragnhildur Sverrisdóttir skrifar:

Norska viðskiptablaðið Dagens Næringsliv fjallar í dag um Björgólf Thor Björgólfsson. Byggir greinin að mestu leyti á eldri viðtölum og fréttum í ýmsum alþjóðlegum fjölmiðlum en að auki á erindi Björgólfs Thors á nýlegri ráðstefnu danska blaðsins Börsen í Kaupmannahöfn. Þá ræddi blaðamaðurinn stuttlega við Björgólf Thor að ráðstefnunni lokinni, auk þess að senda nokkrar fyrirspurnir í framhaldinu. Í greininni er stiklað á stóru í viðskiptaferli Björgólfs Thors og sagt frá skuldauppgjöri hans og gagnrýni á uppgjörið við hrunið á Íslandi. Í hádegisfréttum gerði fréttaritari RÚV í Noregi stuttlega grein fyrir umfjöllun blaðsins. Grein Dagens Næringsliv í heild má sjá hér.

Fréttaflutningur varð málflutningur

Fri, 16 Sep 2011 15:28:00 +0000

Ragnhildur Sverrisdóttir, talsmaður Björgólfs Thors Björgólfssonar, skrifar:

Fjölmiðlar hafa undanfarið sagt af því fréttir að Ólafur Kristinsson lögmaður hyggi á vitnamál gegn Björgólfi Thor Björgólfssyni. Ríkisútvarpið er einn þessara fjölmiðla, en í Speglinum á fimmtudagskvöld breyttist fréttaflutningurinn hins vegar í málflutning. Virtist fréttamaðurinn Sigrún Davíðsdóttir leggja sig fram um að grafa upp atriði, sem hún teldi að gætu hugsanlega orðið vitnamálinu til framdráttar. Í því skyni bar hún á borð hálfsannleika og vitnaði í þessa heimasíðu máli sínu til stuðning.

Enginn reiðari Björgólfi Thor en ég sjálfur

Thu, 15 Sep 2011 07:39:00 +0000

Í síðustu viku birti danska viðskiptablaðið Börsen við mig viðtal sem var tekið í tengslum við erindi sem ég hélt á ráðstefnu í Kaupmannhöfn miðvikudaginn 7.september á vegum Börsen og Norrænu ráðherranefndarinnar. Í viðtalinu kemur blaðamaðurinn víða við og svara ég spurningum hans eftir föngum. Aðspurður svara ég því m.a. að mér er vel ljóst að margir eru reiðir útí mig á Íslandi vegna aðildar minnar að bankaþenslunni og hruninu en þó er enginn reiðari Björgólfi Thor en ég sjálfur.

Hrun krónunnar óháð falli bankanna

Wed, 14 Sep 2011 13:15:00 +0000

Hrun krónunnar hefur lítið með útrás og fall íslensku bankanna að gera. Krónan var fallin áður en bankarnir féllu. Efnahagur heimilanna skemmdist þannig ekki vegna þess að bankarnir féllu heldur vegna þess að gjaldmiðill þjóðarinnar, krónan, féll. Þetta er álit Jóns Helga Egilssonar, verkfræðings og stundakennara við Háskóla Íslands. Jón Helgi, sem stundar doktorsnám í peningamálahagfræði, segir skýrt að hrun íslensku krónunnar 2008 hafi lítið með útrás og fall íslensku bankanna að gera. Viðskiptablaðið hefur eftir honum að á Íslandi hafi verið rekin vaxtamunarstefna sem gerði landið háð vaxtamunarviðskiptum og vegna almennrar áhættufælni í heiminum þá hafi þau viðskipti dregist snögglega saman. Menn hafi farið með fjármuni sína í öruggari hafnir – og Íslendingar neyddust til að horfast í augu við að stöðugur viðskiptahalli er óstöðugt jafnvægi.

Ársgömul tíðindi

Mon, 12 Sep 2011 11:03:00 +0000

Ólafur Kristinsson lögmaður boðaði fyrir réttu ári að hann ætlaði að safna fyrrum hluthöfum í Landsbankanum saman og hefja hópmálsókn gegn mér. Hann hefur nú birt auglýsingu, þar sem hann brýnir enn fyrrum hluthafa til að hafa samband við sig, svo hægt verði að fara í svokallað vitnamál. Ólafur heldur því fram að ég hafi verið ranglega skilgreindur sem ótengdur aðili innan bankans og horfir þar langt aftur í tímann og hunsar upplýsingar sem fram hafa komið. Fram að yfirtöku fyrirtækja minna á Actavis voru Landsbankinn og Fjármálaeftirlitið vissulega ekki sammála um hvort líta bæri svo á að ég hefði yfirráð yfir því félagi, en þar fór ég með tæplega 40% hlutafjár. Hafa skal í huga að þau lán sem hér um ræðir voru greidd upp í Landsbankanum við yfirtökuna árið 2007. Samantekt um þessi mál er að finna hér.

Erindi í Kaupmannahöfn

Thu, 8 Sep 2011 09:27:00 +0000

Í gær hélt ég erindi á málþingi í Kaupmannahöfn á vegum danska viðskiptablaðsins Börsen og Norðurlanda í brennidepli. Auk mín héldu framsögu þeir Lars Christensen, yfirmaður greiningardeildar Danske Bank og Helgi Hjörvar, alþingismaður og formaður efnahags- og skattanefndar Alþingis. Efni málsþingsins var hvaða lærdóm megi draga af kreppunni á Íslandi og hvernig verja megi banka- og fjármálageirann fyrir samsvarandi kreppum í framtíðinni.

Rangfærslur sem útflutningsvara

Mon, 5 Sep 2011 12:56:00 +0000

Breska blaðið Observer birti um síðustu helgi grein um mig, sem var uppfull af ósannindum og hálfsannleika. Eins og kemur fram í athugasemd við greinina á vef blaðsins hef ég leitað til lögmannsstofu og lagt fram athugasemdir vegna vinnubragða fjölmiðilsins. Sigrún Davíðsdóttir, annar höfunda greinarinnar í Observer, birti færslu á bloggsíðu sinni í gær þar sem hún skýrir frá þessu. Hún bætir því við að sl. vetur hafi ég kært hana til siðanefndar Blaðamannafélags Íslands vegna umfjöllunar hennar um aflandsfélög Landsbankans. Sigrún segir að siðanefnd hafi vísað kærunni á bug. Hins vegar ferst fyrir hjá Sigrúnu að geta þess að í umræddri frétt fór hún rangt með atriði úr skýrslu rannsóknarnefndar Alþingis.

Seðlabankinn fékk hverja krónu til baka

Thu, 18 Aug 2011 09:44:00 +0000

ALMC bankinn, áður Straumur-Burðarás, hefur gert upp að fullu lán sín hjá Seðlabanka Íslands, að því er fram kemur í frétt Viðskiptablaðsins. Seðlabankinn tapar engu á lánveitingu til bankans, sem ríkið taldi af einhverjum ástæðum þörf á að yfirtaka vegna tímabundins lausafjárvanda.

Undarleg eftiráspeki

Thu, 11 Aug 2011 14:56:00 +0000

Dagblaðið DV birti í gær undarlega frétt þar sem vitnað er í sum af svörum mínum við 23 spurningum ritstjóra Frjálsrar verslunar um ástandið á fjármálamörkuðum, stöðu íslensku krónunnar og vanda íslensku bankanna vorið 2008. Erfitt er að sjá hver fréttin er í frétt DV. Þó virðist blaðið vera að reyna að tengja svör mín um að skuldlaus ríkissjóður og miklar eignir lífeyrissjóða væri vísbending um styrkleika baklands bankanna við umræðu sem kom upp síðar um hvort ríkissjóður bæri ábyrgð á innustæðum í bönkum. Þarna er mikill misskilningur á ferð og undarleg eftiráspeki. Umræðan á þessum tíma um skuldleysi ríkissjóð snérist um svigrúm ríkisins til lántöku til að styrkja Seðlabankann í því hluverki sínu að veita bönkum lán til þrautavara. Sú umræðu varðaði aldrei innistæðutryggingar.

Var að reyna að bjarga bankanum og breyta

Thu, 14 Jul 2011 10:43:00 +0000

Oft hef ég orðið var við misskilning og vanþekkingu í eftiráumræðunni um atburðarásina síðustu dagana fyrir hrun íslenska bankakerfisins og þá m.a. í tengslum við hvert hlutverk mitt var og hvað ég var að reyna að gera. Eins og ég hef áður bent á þá virðist þáverandi fjármálaráðherra ekki hafa skilið þær hugmyndir sem við kynntum og þá hef ég einnig bent á að frásögn í skýrslu rannsóknarnefndar Alþingis af atburðarásinni er afar ófullnægjandi og gefur því möguleika á ótal röngum ályktunum. Í ágætri bók sinni „Why Iceland?“ fjallar Ásgeir Jónsson, hagfræðingur og fyrrum forstöðumaður greiningardeildar Kaupþings á sanngjarnan hátt og af þekkingu um það sem ég var að reyna að gera en hann segir að í aðdragandanum hafi ég verið að reyna að bjarga Landsbankanum og breyta honum.