BTB - Fréttir

Tugir milljarða til íslenskra banka

Thu, 16 May 2013 17:07:00 +0000

Viðskiptablaðið birtir í dag tveggja síðna úttekt um endurskipulagningu Actavis og skuldauppgjör mitt og fjárfestingarfélags míns, Novator. Þar kemur vel fram hversu flókið ferlið var, þar sem leggja þurfti áherslu á að hámarka virði þeirra miklu eigna sem lágu til grundvallar uppgjörinu og semja við fjölda lánardrottna.

Novator 6. stærsti hluthafi Actavis

Thu, 2 May 2013 13:45:00 +0000

Bandaríska lyfjafyrirtækið Watson – nú Actavis - hefur gengið frá lokagreiðslu vegna kaupanna á Actavis fyrir ári. Árangurstengd greiðsla vegna kaupanna verður greidd að fullu, alls 5,5 milljónir bréfa í hinu sameinaða félagi. Actavis er nú skráð í kauphöllinni í New York og er markaðsvirði félagsins rúmir 13,3 milljarðar bandaríkjadollara, sem samsvarar um 1.562 milljörðum króna. NDS sem er að stærstum hluta í eigu Novators, fjárfestingarfélags míns, er nú 6. stærsti hluthafi félagsins. Eignarhlutur félagsins er nú virði um 520 milljón dollara, eða rúmlega 60 milljarðar króna.

Frábær Fanfest CCP

Tue, 30 Apr 2013 14:53:00 +0000

Árlegri hátíð CCP, Fanfest, lauk um helgina. Það var frábært að koma í Hörpu og sjá allan þann fjölda sem lagt hafði leið sína til landsins til skrafs og ráðagerða um EVE Online tölvuleikinn og að sjálfsögðu líka Dust 514, sem fer formlega í loftið eftir hálfan mánuð. CCP lætur líka til sína taka í raunheimum, með gerð sjónvarpsþátta í leikstjórn Baltasars Kormáks og samningum við hasarblaðaútgefandann Dark Horse.

Órökstudd geðþóttaákvörðun

Mon, 11 Mar 2013 16:41:00 +0000

Straumur-Burðarás fjárfestingabanki var felldur fyrir réttum fjórum árum, 9. mars 2009. Enn hefur sú ákvörðun ekki verið rökstudd og í skjalasafni forsætisráðuneytisins finnst ekki eitt einasta skjal sem varðar málið. Engin skjöl hafa heldur fundist í fórum fjármálaráðuneytisins, viðskiptaráðuneytisins eða Seðlabankans. Engin minnisblöð, engar fundargerðir eða bréf. Hvenær kemur að því að stjórnvöld verða krafin svara um hvers vegna þessi afdrifaríka ákvörðun var tekin? Allt bendir til að um órökstudda geðþóttaákvörðun hafi verið að ræða, en margyfirlýst ást stjórnmálamanna á gagnsæi hlýtur að tryggja að málið verði að fullu upplýst, þótt síðar verði.

Enn situr Nova á toppnum!

Mon, 25 Feb 2013 12:01:00 +0000

Starfsemi símafyrirtækisins Nova hefur allt frá upphafi einkennst af miklum metnaði og góðri þjónustu. Þar er alltaf leitað nýrra leiða til að gera „stærsta skemmtistað í heimi“ enn skemmtilegri og það kunna viðskiptavinirnir greinilega vel að meta.

Ástæða til að fagna

Fri, 1 Feb 2013 23:36:00 +0000

Viðbrögðin við Icesave á undanförnum árum hafa reynst þjóðinni þungur baggi, mörg ljót orð hafa fallið milli frænda og vina um landráð og svik og margir hafa trúað yfirlýsingum um að byggð myndi nánast leggjast af á Íslandi og börn og barnabörn yrðu að þræla í þágu erlendra kröfuhafa um langan aldur. Að baki flestum slíkum yfirlýsingum var ekki mannvonska, heldur bjargföst trú manna að þeir væru að vinna þjóð sinni vel. En sú skelfing og ótti, sem alið var á, var hin eina sanna Icesave-grýla. Það er full ástæða til að fagna dauða hennar.

Enn segir af Icesave

Tue, 29 Jan 2013 22:03:00 +0000

Icesave hefur verið helsta umræðuefni fjölmiðla frá því að dómur féll Íslandi í vil á mánudagsmorgun. Sjálfsagt á sú umræða eftir að lifa töluvert lengur, enda hefur Icesave verið blásið upp og gert að risavaxinni Grýlu og holdgervingi kreppunnar. En einmitt vegna þess hve margir spyrða Icesave og kreppuna saman í huganum, þá er von til þess að farsæl niðurstaðan auki bjartsýni og baráttuþrek.

Staða Landsbankans einsdæmi í heiminum

Mon, 28 Jan 2013 11:59:00 +0000

Grýla gamla er loksins dauð! Ísland vann fullnaðarsigur fyrir EFTA-dómstólnum í Icesave-málinu. „Ég man ekki eftir banka sem fallið hefur í heiminum sem skilið hefur við með þessum hætti,“ sagði utanríkisráðherra í morgun og ítrekaði að allt sem Ísland sagði um styrk og greiðslugetu þrotabús Landsbankans stóðst.

DUST 514 fyrir almenning

Fri, 25 Jan 2013 14:05:00 +0000

Það er ánægjulegt að lesa um viðbrögð við nýjum leik CCP, DUST 514. Leikurinn var opnaður almenningi á miðvikudag, 23. janúar, þegar svokölluð opin beta-prófun leiksins hófst, en það er síðasta þróunarstig leiksins.

Leiksýning

Wed, 16 Jan 2013 15:15:00 +0000

DV fjallar í dag um greinargerð lögmanns míns vegna svokallaðs vitnamáls sem Vilhjálmur Bjarnason fjárfestir og frambjóðandi hefur farið fram á fyrir héraðsdómi Reykjavíkur. DV tíundar helstu atriði greinargerðarinnar með sínum hætti. Blaðið sleppir því þó alveg að nefna fullyrðingar í henni um að Vilhjálmur ætli sér að stilla upp allsherjar leiksýningu í dóminum sér og fjölmiðlum til skemmtunar, en dóminum og öðrum til ama og trafala. Þessi ummæli staðfestir blaðið þó í raun með birtingu fréttarinnar, enda blekið vart þornað á greinargerðinni þegar hún er komin í hendur blaðamanns.

Við sama heygarðshornið

Mon, 26 Nov 2012 19:33:00 +0000

DV slær því fram með upphrópunum í dag að embætti sérstaks saksóknara sé að rannsaka meinta markaðsmisnotkun Straums-Burðaráss fjárfestingarbanka. Kæran á að hafa borist embætti sérstaks saksóknara „fyrir nokkrum mánuðum“ að því er DV segir. Blaðið tíundar svo hvaða þáverandi starfsmenn bankans gætu hugsanlega legið undir grun. Þar er ég að sjálfsögðu ekki á blaði, en það kemur ekki í veg fyrir að blaðið birti mynd af mér með fréttinni og á forsíðu blaðsins. DV dregur aldrei af sér þegar í boði er að tengja nafn mitt á neikvæðan hátt við fréttir blaðsins.

Watson og Actavis sameinast

Thu, 1 Nov 2012 11:03:00 +0000

Kaup bandaríska lyfjafyrirtækisins Watson Pharmaceuticals á Actavis hafa gengið formlega í gegn og fyrirtækið tekur að fullu við stjórnartaumunum. Samkeppnisyfirvöld í Bandaríkjunum og Evrópu hafa samþykkt samruna fyrirtækjanna og lagt þar með blessun sína yfir þetta þriðja stærsta samheitalyfjafyrirtæki heims, sem mun bera nafnið Actavis. Ég hef setið minn síðasta stjórnarfund fyrir Actavis eftir þrettán ára samleið.

Skuldauppgjör á áætlun

Fri, 26 Oct 2012 11:23:00 +0000

Viðskiptablaðið greindi í gær frá stöðunni á skuldauppgjöri mínu við lánardrottna. Þar kom fram að uppgjörið er nú rúmlega hálfnað, en stórt skref var stigið í vor með sölunni á Actavis til Watson. Skuldauppgjör mitt gengur samkvæmt áætlun og eftir því samkomulagi sem náðist við alla kröfuhafa í júlí 2010.

Gamalt tros um gengisvarnir

Thu, 25 Oct 2012 13:54:00 +0000

DV bar gamalt tros og illa lyktandi á borð fyrir lesendur sína á mánudag – og ekki í fyrsta skipti. Síendurteknar upphrópanir blaðsins um stöðutöku mína og félaga minna gegn krónunni hafa ítrekað verið hraktar. Þetta veit DV og tók því þann kostinn núna að leita engra umsagna um skrifin og nefna ekki hálfu orði allar fyrri athugasemdir mínar. Það þarf reyndar ekki að koma á óvart, enda fékk blaðið nýlega þá umsögn í dómi Hæstaréttar að skrif þess væru „smekklaus“ – og ljóst að þar tók Hæstiréttur varlega til orða.

Landsbankinn borgar Icesave

Tue, 16 Oct 2012 13:48:00 +0000

Slitastjórn Landsbankans hefur þegar greitt 677 milljarða króna af forgangskröfum í þrotabú bankans. Upphæðin samsvarar því sem Íslendingar hefðu átt að greiða fyrir síðasta Icesavesamninginn sem gerður var við Breta og Hollendinga.

Ábyrgð, gagnrýni og gagnsæi

Thu, 11 Oct 2012 15:08:00 +0000

Enginn þeirra 147, sem kom fyrir Rannsóknarnefnd Alþingis, gekkst við ábyrgð sinni á hruni efnahagslífsins haustið 2008. Skýrsla nefndarinnar var mikilvægt innlegg í nauðsynlegt uppgjör. Vissulega var hún ekki gallalaus, en þar hefur Alþingi því miður ekki viljað hafa það sem sannara reynist. Vonandi tekst þinginu betur til þegar það ræðst í löngu tímabæra rannsókn á einkavæðingu bankanna.

Margur heldur mig sig

Wed, 26 Sep 2012 15:00:00 +0000

DV birti á mánudag grein um að Vilhjálmur Bjarnason fjárfestir hafi farið fram á vitnamál fyrir Héraðsdómi Reykjavíkur. Hann telur ástæðu til að kanna hvort átt hafi sér stað blekkingar um eignarhaldið í Landsbankanum. DV gengur lengra og fullyrðir með afar ósmekklegum hætti í fyrirsögn sinni að um blekkingar sé að ræða. Ekki að það þurfi að koma á óvart á þeim bænum frekar en fyrri daginn. Hafa skal það sem betur selur.

Rangt er rangt á öllum tungumálum

Fri, 21 Sep 2012 12:52:00 +0000

Þingsályktunartillaga um að þýða beri Rannsóknarskýrslu Alþingis á ensku hefur enn á ný verið lögð fram á Alþingi. Þingmennirnir sem leggja hana fram virðast ekki telja ástæðu til að efast um að allt sé rétt og nákvæmt í skýrslunni. Staðreyndin er sú, að þótt skýrslan sé sjálfsagt að meginefni rétt þá er hún fjarri því að vera óskeikul. Nær væri að þingmennirnir beittu sér fyrir leiðréttingu á rangfærslunum áður en ráðist verður í að þýða þær á önnur tungumál.

Eiturefnaúrgangur netsins

Sat, 15 Sep 2012 09:10:00 +0000

Ef fáfræði væri keppnisgrein á Ólympíuleikunum væri riðlakeppnin háð í athugasemdakerfum dagblaðanna, ritaði blaðamaðurinn Mic Wright í pistli á heimasíðu breska dagblaðsins Telegraph á dögunum. Wright fullyrðir að athugasemdaskrif séu eiturefnaúrgangur netsins og þessi skrif hans kalla að sjálfsögðu á ótal athugasemdir – og ekki allar fagrar. Fyrir rúmu ári ritaði Economist um þau stakkaskipti, sem fjölmiðlun hefur tekið á síðustu árum og tók þeirri þróun fagnandi, að fréttir væru nú í æ ríkari mæli ritaðar af þeim sem áður voru eingöngu lesendur, hlustendur eða áheyrendur, the people formerly known as the audience, eins og Economist kallaði það. Tvær áhugaverðar hliðar á sama peningi.

Alþingi fær ekkert að vita

Wed, 4 Jul 2012 11:33:00 +0000

Seðlabanki Íslands hefur ítrekað þá afstöðu sína að Alþingi Íslendinga fái ekki að vita hvers vegna Seðlabankinn ákvað að lána Kaupþingi nær allan gjaldeyrisforða landsins, 500 milljónir evra eða um 82 milljarða króna, skömmu fyrir hrunið haustið 2008. Lánið var veitt með veði í FIH bankanum í Danmörku, en nú herma fréttir að Seðlabankinn – og þar með landsmenn – muni tapa tugum milljarða króna. Á sama tíma og þetta fé rann til Kaupþings var Landsbankanum neitað um lán að svipaðri upphæð til að reyna að liðka fyrir flutningi á Icesave í breska lögsögu.

Verne valið á Sustainia 100-listann

Mon, 25 Jun 2012 15:02:00 +0000

Fyrirtækið Verne Global hefur verið valið á listann Sustainia 100 yfir fyrirtæki sem stunda sjálfbæra starfsemi. Verne rekur gagnaver í Reykjanesbæ og knýr það áfram með hreinni orku frá jarðvarma- og vatnsfallsvirkjunum. Hinar sjálfbæru orkulindir, stöðugleiki orkunnar og góð tenging við umheiminn eru grundvallarskilyrði fyrir rekstri gagnavers Verne.

Sorglegt

Wed, 20 Jun 2012 15:10:00 +0000

Sorglegt – var það fyrsta sem kom mér í hug þegar ég frétti að tillaga um opinbera rannsókn á einkavæðingu bankanna dagaði uppi á Alþingi nú í þinglok. Ég hef lagt mig fram um að koma á framfæri opinberlega gögnum um einkavæðingu Landsbankans og lýsingum á atburðum eins og þeir blöstu við mér. Þá hafa fræðimenn rannsakað tiltekna þætti einkavæðingarinnar og birt lærðar greinar. Þegar fréttir berast síðan af því að tillaga um rannsókn á þessari tíu ára gömlu einkavæðingu komist ekki í gegnum Alþingi vegna ótta sumra um að einnig upplýsist um enn nýrri aðgerðir stjórnvalda þá er ekki nema von að maður velti því fyrir sér hvað það er sem stjórnmálamenn eru hræddir við að komi á daginn?

Sex ára rógur

Wed, 13 Jun 2012 11:39:00 +0000

DV vitnaði í vikunni í sex ára gamla skýrslu, sem var pöntuð og borguð af samkeppnisaðilum mínum og Actavis. Þótt blaðið reki þar róg og dylgjur kemur ekkert fram um hvers vegna sá óhróður telst frétt núna, sex árum síðar. Hver telur sig hafa hagsmuni af að koma þessu gamla efni á framfæri? Og hvers vegna hleypur DV til?

Kveinstafir úr hörðustu átt

Sat, 2 Jun 2012 17:01:00 +0000

Undarleg er sú árátta sumra manna að kveinka sér hátt og í hljóði undan eðlilegum viðskiptaháttum. Þannig virðast þeir á einhvern hátt telja óeðlilegt að þeir standi reikningsskil gjörða sinna, jafnvel þótt þeir hafi farið mikinn og lagt gríðarlegar upphæðir af fé annarra undir í viðskiptum sínum. Þegar kröfuhafar, sem lánuðu þeim fyrir umsvifunum, fara fram á endurgreiðslu þeirra lána og ganga svo að veðum sínum heitir það að „allt hafi verið hirt af þeim“. Þetta viðhorf er ef til vill skiljanlegt þegar haft er í huga að ekki voru þessir sömu menn reiðubúnir til að ganga í persónulegar ábyrgðir fyrir skuldbindingum sínum. Það er auðvitað skýringin á því að þeir eru ekki sjálfir gjaldþrota þrátt fyrir gríðarlegan skuldahala fyrirtækja sem þeir stýrðu um tíma.

Túlkun RNA og FME hafnað

Thu, 24 May 2012 12:24:00 +0000

Rannsóknarnefnd Alþingis studdist við allt önnur viðmið en í gildi voru samkvæmt lögfestum reglum á Íslandi og innan Evrópu um mat á tengslum vegna stórra áhættuskuldbindinga af útlánum, eins og ég hef ítrekað bent á. Fjármálaeftirlitið virðist hafa stuðst við sambærilega túlkun í málatilbúnaði sínum fyrir dómstólum. Þeirri túlkun hefur nú verið vísað til föðurhúsanna af héraðsdómi og Hæstarétti Íslands. Sú staðreynd ætti að verða forseta Alþingis tilefni til að endurskoða þá ákvörðun sína að hafna birtingu athugasemda minna á vefsíðu Alþingis, þar sem skýrsla rannsóknarnefndar fær ein að ríkja, með öllum sínum rangfærslum.

Enn sækir Nova fram

Fri, 11 May 2012 14:42:00 +0000

Nova hagnaðist um 374 milljónir króna í fyrra og rekstrarhagnaður fyrir fjármagnsliði, afskriftir og skatta var rúmur hálfur milljarður króna. Nova hefur sótt í sig veðrið jafnt og þétt frá því að fyrirtækið tók til starfa og er nú með 26% markaðshlutdeild á fjarskipamarkaði. Viðskiptavinum félagsins fjölgaði um 17 þúsund í fyrra.

Þinginu neitað um upplýsingar

Fri, 4 May 2012 15:30:00 +0000

Seðlabankinn hefur hafnað ósk formanna tveggja þingnefnda um að fá útskrift af símtali fyrrverandi forsætisráðherra og fyrrverandi Seðlabankastjóra. Í símtalinu ræddu þeir um 80 milljarða króna lán (500 milljón evrur) til Kaupþings sama dag og neyðarlögin voru sett, 6. október 2008. Aldrei hefur verið skýrt hvers vegna sú undarlega ákvörðun var tekin. Engin formleg samþykkt bankaráðs Seðlabankans lá fyrir og enginn lánasamningur var útbúinn. Getur staðist að þessi ákvörðun, sem kostaði ríkissjóð tugi milljarða króna, verði aldrei skýrð? Hvað er hægt að kalla slíka stjórnsýslu? Á meðan rannsóknarnefnd Alþingis birtir upplýsingar um fjármál einstaklinga ríkir þagnarskylda um hvernig stjórnvöld tala sig niður á ákvarðanir sem varða þjóðarhag. Er ekki allt í lagi? Ég bara spyr.

Traust í viðskiptum og skuldaskil

Tue, 1 May 2012 14:18:00 +0000

Viðtal sem Sveinn Helgason fréttamaður tók við mig í New York í síðustu viku hefur nú verið birt á vef RÚV. Við Sveinn fórum nokkuð víða í þessu 9 mínútna spjalli. Megináherslan var á sölu Actavis til Watson, enda var það tilefni viðtalsins. Ég lagði áherslu á að salan væri mikilvægur hluti af skuldauppgjöri mínu, en ég myndi eignast hlut í Watson þegar fram liðu stundir og væri bjartsýnn á framtíð fyrirtækisins. Ég benti á að lánardrottnar gengju sáttir frá borði.

Með ný og betri spil á hendi

Mon, 30 Apr 2012 17:42:00 +0000

Kaup Watson á Actavis vöktu að vonum mikla athygli í síðustu viku. Nær allir íslenskir fjölmiðlar fluttu ítarlegar og vandaðar fréttir af sölunni. Þar kom skýrt fram, að salan á einu af stærstu samheitalyfjafyrirtækjum heims var stór þáttur í skuldauppgjöri mínu. Ég lýsti því sjálfur svo í viðtölum að nú væri búið að stokka spilin upp og ég væri kominn með ný á hendi. Ég ætla mér að spila vel úr þeim.

Góður samningur í höfn

Wed, 25 Apr 2012 09:14:00 +0000

Bandaríska lyfjafyrirtækið Watson hefur gengið frá samningum um kaup á Actavis. Kaupverðið er samtals 4,25 milljarðar evra, eða um 700 milljarðar króna. Lang stærsti hluti þeirrar upphæðar rennur til lánardrottna Actavis og minna. Þar er Deutsche Bank stærstur en Landsbankinn, Straumur og Glitnir áttu einnig verulegra hagsmuna að gæta. Þessir samningar eru öllum aðilum hagstæðir. Í samningunum felst að fjárfestingarfélag mitt Novator mun eignast hlut í sameinuðu félagi Watson og Actavis. Stærð þess hlutar ræðst af afkomu Actavis. Eftir kaupin verður sameinað fyrirtæki þriðja stærsta samheitalyfjafyrirtæki heims með öflugar starfsstöðvar og hæft starfsfólk. Hér er tilkynning sem birt var í Kauphöllinni í New York vegna þessara viðskipta.