Til þeirra er málið varðar
Fréttir

Novator 6. stærsti hluthafi Actavis

2.5.2013 Fréttir

Bandaríska lyfjafyrirtækið Watson – nú Actavis - hefur gengið frá lokagreiðslu vegna kaupanna á Actavis fyrir ári. Árangurstengd greiðsla vegna kaupanna verður greidd að fullu, alls 5,5 milljónir bréfa í hinu sameinaða félagi. Actavis er nú skráð í kauphöllinni í New York og er markaðsvirði félagsins rúmir 13,3 milljarðar bandaríkjadollara, sem samsvarar um 1.562 milljörðum króna.  NDS sem er að stærstum hluta í eigu Novators, fjárfestingarfélags míns, er nú 6. stærsti hluthafi félagsins. Eignarhlutur félagsins er nú virði um 520 milljón dollara, eða rúmlega 60 milljarðar króna.

Vegna þessa áfanga sendi Novator út fréttatilkynningu, þar sem segir:

„Eins og fram kom í apríl í fyrra, þegar Watson festi kaup á Actavis, kaus Björgólfur Thor að fá stóran hlut greiðslu sinnar í formi hlutabréfa og var endanlegur fjöldi hluta háður afkomu Actavis.  Nú liggur fyrir að um fulla greiðslu er að ræða og hafa hlutirnir verið gefnir út. Hluti bréfanna rennur til tveggja íslenskra banka, Landsbankans og ALMC og meðfjárfesta Novators.

Björgólfur Thor hefur verið hluthafi í Actavis í tæp 14 ár. „Ég hef alltaf haft trú á fyrirtækinu, allt frá fyrsta degi þrátt fyrir mikla erfiðleika á köflum þar sem við sáum mikil verðmæti tapast. Núna er Actavis eitt öflugasta samheitalyfjafyrirtæki heims og ég er mjög ánægður að halda góðum eignarhlut,“ segir Björgólfur Thor. „Ég lít enn á eign mína sem langtímafjárfestingu og ég er sannfærður um að fyrirtækið muni eflast, enda í höndum mjög hæfra stjórnenda og starfsmanna úr röðum beggja hinna sameinuðu félaga.

Lánardrottnar Björgólfs Thors munu áfram eiga kröfur á Novator í samræmi við skuldauppgjör hans í júlí 2010. Það skuldauppgjör er nú langt komið.

Björgólfur Thor sinnir áfram fjárfestingum Novators víðsvegar um heim.  Þar má nefna Play í Póllandi, sem er fjórða stærsta fjarskiptafyrirtækið þar í landi með hátt í 10 milljón viðskiptavini.  Novator er stofnandi fyrirtækisins, byggði það frá grunni og er nú leiðandi hluthafi. Þá mun hann áfram styðja við fjárfestingar Novators á Íslandi, en það eru tölvuleikjaframleiðandinn CCP, fjarskiptafyrirtækið Nova og gagnaverið Verne.“



RSS fréttastraumur

Allt efni á vefnum www.btb.is er unnið af Björgólfi Thor Björgólfssyni eða fyrir hann. Hann ber ábyrgð á efni vefjarins og er jafnframt handhafi höfundarréttar.


Þetta vefsvæði byggir á Eplica