BTB - Hrunið

Eignarhald félaga lá ljóst fyrir – Landsbankinn og FME deildu um túlkun reglna

Thu, 23 Sep 2010 16:22:00 +0000

Viðskiptablaðið greinir frá því í morgun að slitastjórn Landsbankans rannsaki nú hvort áhættuskuldbindingar bankans hafi farið yfir leyfileg mörk og eru viðskipti mín við bankann á árunum fram til 2007 nefnd sérstaklega. Aðrir fjölmiðlar hafa síðan tekið málið upp eftir Viðskiptablaðinu. Væntanlega tengist þessi fréttaflutningur eitthvað framgöngu lögmanns eins, Ólafs Kristinssonar, sem er að safna saman fyrrum hluthöfum Landsbankans í málsókn gegn Landsbankanum vegna rangra upplýsingagjafa. Kjarni þessa máls er að FME og Landsbankinn voru að fullu upplýst um eignarhluta minn í bankanum og í félögum sem áttu í viðskiptum við hann en fram að yfirtöku fyrirtækja minna á Actavis var ágreiningur um hvort ég hefði yfirráð yfir því félagi en þar fór ég með undir 40% hlutafjár. Hafa skal í huga að þau lán sem hér um ræðir voru greidd upp í Landsbankanum árið 2007.

Eftirspurnarskellir ollu vandræðum

Tue, 21 Sep 2010 09:02:00 +0000

Ásgeir Daníelsson, hagfræðingur hjá Seðlabankanum flutti erindi nýlega um áhrif peningastefnu Seðlabankans á hrun bankakerfisins haustið 2008. Þó svo ég lýsi mig ekki sammála öllum hans ályktunum fannst mér frískandi að kynna mér efni fyrirlestrarins í samanburði við hálf- og vanþekkinguna sem einkennir umræðuna um orsakir hrunsins á vettvangi fjölmiðla- og stjórnmála. Ásgeir leggur áherslu á að það sem mestu hafi valdið um hvernig fór voru svokallaðir eftirspurnarskellir, ekki peningastefnan.

„Síðasta lánið undir sólinni“ úr sögunni

Fri, 10 Sep 2010 00:00:00 +0000

DV greindi frá því í dag að lán Samsonar hjá Arion-banka sem ítrekað var ranglega sagt vera vegna kaupa félagsins á Landsbankanum 2003 og fjármálaráðherra sagði vera „síðasta lánið undir sólinni sem ætti að afskrifa“ hefur verið gert upp í Arion-banka. Í greininni kemur fram að Landsbankinn og Arion hafi skipt á kröfum. Jafnframt kemur fram að allar líkur séu á því að lánið sem nú er í Landsbankanum verði greitt að fullu. Því má segja að „síðasta lánið undir sólinni“ sé úr sögunni. Fjármálaráðherra getur því sofið rólegur áhyggjulaus af afskriftum af þessu láni.

Skuldauppgjör er ekki kyrrstaða

Mon, 6 Sep 2010 09:53:00 +0000

Ýmsir hafa séð ástæðu til að vekja athygli á samningum þeim sem ég gerði um uppgjör allra minna skulda. Því miður virðist gæta misskilnings á inntaki og formi þeirra, jafnvel hjá opinberum aðilum sem best eiga að þekkja til uppgjörsmála og leggja uppgjör mitt að jöfnu við einhverskonar kyrrstöðusamninga. Ragnhildur Sverrisdóttir, talsmaður Novator, skrifar grein í Fréttablaðið í morgun þar sem hún bendir á að skuldauppgjör mitt er ekki einhverjir kyrrstöðusamningar. Eins og fram hefur komið þá er ég ekki í aðstöðu til að fjalla um einstök atriði í samningsins vegna trúnaðar við þá erlendu og innlendu banka sem að þeim koma.

Markmiðið skýrt - hámarka verðmæti eigna og stuðla að sem mestum heimtum

Thu, 2 Sep 2010 14:27:00 +0000

Stöð 2 greindi frá efnisatriðum samkomulagsins sem ég og fyrirtæki mitt gerði við lánardrottna í júlí sl. Því miður get ég ekkert sagt um einstök atriði samningsins vegna trúnaðar sem ég er bundinn. Fréttin er túlkuð á alla kanta í fjölmiðlum og á vefnum. Það sem mér finnst ekki koma skýrt fram í fréttinni er að markmið samkomulagsins var að skapa aðstæður til að hámarka verðmæti eigna minna og fyrirtækja minna svo heimtur lánardrottna gætu orðið sem allra mestar. Bloggari að nafni Andri Haraldsson virðist hafa hitt naglann á höfuðið þegar hann segir: „Semsagt, með því að fella niður persónulegar ábyrgðir og taka þess í stað ábyrgðir sem tengjast eignum sem ekki eru persónulegar eignir BTB, þá er bankinn að auka heimtur sínar um 95% stig -- eða 20 sinnum meiri innheimtur en gert var ráð fyrir.“

Það hlýtur að vera eitthvað bogið við þetta!

Wed, 1 Sep 2010 12:33:00 +0000

Í júlí gat ég skýrt frá því opinberlega að samkomulag hefði náðst um uppgjör skulda minna og fjárfestingarfélags míns, Novators, við innlenda og erlenda lánardrottna. Í uppgjörinu fólst að skuldir yrðu ekki gefnar eftir og gerðar upp að fullu og samkomulag er við lánardrottna um ráðstöfun nær allra minna eigna. Uppgjör mitt á dögunum var flestum auðskiljanlegt enda gerðu flestir fjölmiðlar góða grein fyrir því. Hins vegar er ekki hægt að gera ítarlega grein fyrir uppgjörinu þar sem um trúnaðarmál í viðskiptum mínum við fleiri en sex fjármálafyrirtæki er að ræða. Þetta skilja allir sem koma nálægt miðlun upplýsinga um viðskipti með einn undantekningu þó - íslenskri. Á þeim bæ gáfu menn sér að eitthvað hlyti að vera bogið við uppgjörið.

Miklar lántökur, stórt bankakerfi, verðbólga og viðskiptahalli skiptu sköpum á Íslandi

Tue, 31 Aug 2010 17:19:00 +0000

Þórarinn G. Pétursson hefur í samvinnu við Þórarinn Tjörva Ólafsson sett saman áhugaverðan fyrirlestur um hið fjármálalega gjörningaveður 2007 – 2008. Þeir félagar sem báðir eru starfsmenn Seðlabanka Íslands reyna að svara spurningunni “Af hverju fauk Ísland um koll en önnur lönd sluppu betur?“ Svar þeirra er að miklar lántökur einkageirans, stórt bankakerfi, verðbólga og viðskiptahalli hafi skipt sköpum á Íslandi.

Rangar "fréttir"

Sun, 22 Aug 2010 13:46:00 +0000

Mig langar að þakka enn og aftur góð viðbrögð við þessum vef. Flestir hafa góðan skilning á tilgangi hans, þ.e. að skapa mér vettvang til að koma óbjöguðum upplýsingum á framfæri við almenning á Íslandi. En þeir eru líka ýmsir, sem hafa uppi stór orð um áróður og gefa í skyn að fjölmiðlum einum sé treystandi til að fjalla um mín mál og hafa jafnvel fyrir satt að almannarómur ljúgi aldrei. En er það svo? Hér er rétt að nefna nokkrar af þeim röngu „fréttum“, sem hafa verið mest áberandi frá hruninu og sem mikilvægast hefur verið að leiðrétta. Eftir þann lestur getur fólk svarað þeirri spurningu, hvort ég geti treyst á aðra til að koma réttri mynd af mér og viðskiptum mínum til skila.

Endurteknar rangfærslur um krónuviðskipti

Mon, 16 Aug 2010 11:00:00 +0000

DV fjallar í dag um fyrrverandi starfsmann Novators í London, Heiðar Má Guðjónsson. Í greininni eru endurteknar þrálátar rangfærslur um gjaldeyrisviðskipti Novators þar sem látið er í veðri vaka að Novator hafi unnið gegn krónunni. Þetta er ekki rétt. Novator seldi íslenskar krónur þegar gengi hennar var hátt en keypti hins vegar krónur þegar fjaraði undan henni og því stóð Novator með krónunni þegar á reyndi, - öfugt við marga aðra.

Umfjöllun um uppgjör skulda

Mon, 26 Jul 2010 15:14:00 +0000

Íslenskir fjölmiðlar hafa fjallað talsvert um uppgjör mitt og félaga minna við lánardrottna. Þar virðist mesta athygli vekja hversu fjárhæðirnar eru háar og sú staðreynd að hér er um heildauppgjör að ræða og að allar eignir mínar eru undir í þessu uppgjöri. Fram kemur að uppgjörið nemi um 1200 milljörðum króna og að vonir standi til að hægt sé að ljúka því á um fimm árum.

Samið um uppgjör allra skulda

Wed, 21 Jul 2010 14:40:00 +0000

Í kvöld var send fréttatilkynning frá Novator og mér um að lokið sé samningum við innlenda og erlenda lánardrottna um uppgjör allra skulda Novators og mín. Vonir standa til að skuldirnar verði að mestu greiddar upp eftir fimm til sex ár sem þýðir í raun að ég verð að vinna fyrir lánadrottna á meðan. Það er mikill léttir fyrir mig að hafa lokið þessum samningum og markar þetta áfanga í uppbyggingunni eftir hrun fjármálakerfisins á Vesturlöndum haustið 2008..

Pólitísk áhætta að gefa Straumi færi á að lifa

Thu, 24 Jun 2010 10:12:00 +0000

Björn Jón Bragason, sagnfræðingur, birti er í tímaritinu Þjóðmálum sem kemur út í dag grein sem segir að embættismenn hafi litið svo á að það væri pólitísk áhætta að veita Straumi fyrirgreiðslu í mars 2009 þar sem hægt væri að túlka það sem einhverskonar stuðning við mig. Þá kemur fram í greininni að nær vonlaust er að fá upplýsingar eða gögn frá hinu opinbera um málefnalegar ástæður fyrir því af hverju ósk Straums um lánafyrirgreiðlsu var hafnað og hvers vegna FME tók bankann óvænt yfir í stað þess að hann færi í greiðslustöðvun eins og stjórnendur og eigendru bankans vildu og voru að undirbúa. Voandi fást þessi mál upplýst fyrr en síðar því að hagsmunir 20 þúsund hluthafa í Straumi voru í húfi.

Ekki ástæða til að rifta viðskiptum við Straum

Wed, 16 Jun 2010 00:00:00 +0000

Fjölmiðlar birtu í dag bæði hér og hér fréttir af því að á kröfuhafafundi Straums Burðaráss í gær hafi niðurstöður rannsóknar PricewaterhouseCoopers á viðskiptum bankans verið kynntar og hvort ástæða sé til að rifta einhverjum þeirra gjörninga. Þar kom fram að rétt sé að rifta samningi við Íbúðalánsjóð en jafnframt að ekki sé ástæða að rifta neinum viðskiptum við mig eða fyrirtæki sem tengjast mér og jafnframt að ekki væri heldur tilefni til að rifta viðskiptum við föður minn, Björgólf Guðmundsson. Endurskoðunarfyrirtækið kemst einnig að þeirri niðurstöðu að heildarviðskipti tengd okkur feðgum hafi farið yfir áhættumörk. Á sínum tíma var það ekki álit stjórnenda og endurskoðenda bankans.

Spurningum DV svarað

Fri, 4 Jun 2010 00:00:00 +0000

Fréttastjóri DV, Ingi Freyr Vilhjálmsson, hafði við mig samband á miðvikudegi og sagðist vera að skrifa Nærmynd um mig og hvort ég væri reiðubúinn að svara fáeinum spurningum blaðsins sem sendar yrðu í tölvupósti. Áður hafði ég verið í samskiptum við blaðið vegna áhuga þess á viðtali við mig en ég hef ekki viljað fara í viðtöl á meðan ég hef verið að semja við kröfuhafa mína og því talsverð óvissa um mín mál og mína framtíð. Þar sem Nærmynd þessi yrði hvort eð er birt hugsaði ég með mér að ekki myndi skaða að svara fáeinum spurningum. Á endanum urðu spurningarnar fjölmargar og reyndi ég að svara þeim flestum. Blaðið birti nær allar spurningarnar og svörin í blaðinu í dag. Tveimur spurningum og svörum var sleppt er varðaði Icesave og einkavæðingu bankanna en þær birtust síðar á vef blaðsins.

Stöð 2 dregur til baka frétt um stórfelda fjármagnsflutninga

Mon, 10 May 2010 13:58:00 +0000

Frettastofa Stöðvar 2 dróg í kvöld til baka frétt frá í júlí 2009 um að ég ásamt fleirum hefði látið flytja fúlgur fjár af reikningi mínum í Straumi til aflandseyja. Þrátt fyrir að ég hafi hringt á sínum tíma strax og fréttin birtist og lýst því yfir að þetta væri lygi stóð Fréttastofan við fréttina. Og það gerði hún líka eftir að Straumur hafði sent frá sér tilkynningu um að fréttin væri útí hött. Ég sá mig tilneyddan til að verja mig og kærði Fréttastofu Stöðvar 2 fyrir meiðyrði. Nú þegar Fréttastofan hefur viðurkennt mistök og dregið fréttina til baka tel ég enga ástæðu til að halda áfram málarekstri.

Stefni að því að gera upp mínar skuldir

Mon, 19 Apr 2010 13:34:00 +0000

Í skýrslu rannsóknarnefndar Alþingis er greint frá skuldum mínum í þeim íslensku bönkum sem ég var stór hluthafi í fram að yfirtöku ríkisins á þeim í október 2008 og mars 2009, - þ.e. Landsbankanum og Straumi. Vegna þessara umfjöllunar tel ég rétt að gera opinberlega grein fyrir lánum mínum í þessum bönkum og þá um leið leiðrétta rangfærslur sem finnast í skýrslunni en nefndin óskaði hvorki eftir upplýsingum frá mér, né kallaði mig til viðtals og gaf mér því ekki kost á að svara þeim aðfinnslum eða rangfærslum sem að mér beinast. Þess vegna sendi ég í dag frá mér yfirlýsing og greinargerð til fjölmiðla þar sem kemur m.a. fram að ég stefni að því að gera upp mínar skuldir.

Skýrsla rannsóknarnefndar Alþingis kynnt

Mon, 12 Apr 2010 09:14:00 +0000

Skýrsla rannsóknarnefndar Alþingis

var kynnt í dag. Það sem kemur mér mest á óvart eftir kynninguna er hversu heildarniðurstaðan er skýr, - hegðun einstaka banka, stjórnenda þeirra og eigenda og sérfræðinga á þeirra vegum er áþekk þegar litið er um öxl. Ég á eftir að kynna mér efni skýrslunnar en sé í fljótu bragði að talsvert er um mig fjallað og er ég dálítið hissa á sumu því sem ég hef rekist á í ljósi þess að ég var ekki kallaður á fund nefndarinnar.

Fáránleg frétt á Stöð 2

Tue, 23 Mar 2010 14:34:00 +0000

Stöð 2 birti í gærkvöldi fáránlega frétt um "skuggastjórnendur" íslensku bankanna fram til haustsins 2008 og segir í fréttinni að eigendurnir muni " að öllum líkindum sleppa". Fréttastofan tekur dæmi um mig sem "skuggastjórnanda" þegar ég átti fundi með íslenskum ráðamönnum um mánaðarmótin september / október 2008. Þá rambaði bankakerfið á barmi hengiflugs og viðræður voru um sameiningar banka og breytingar á eignarhaldi þeirra. Ljóst er af þessum fréttaflutningi að Stöð 2 virðist ekki skilja hlutverk eigenda í fyrirtækjum og er umhugað um að tengja mig við athæfi sem ég muni "að öllum líkindum sleppa" með. Af þessu tilefni sendi ég fréttastjóra Stöðvar 2 bréf. Annars er rétt að geta þess að íslensk lög hvorki kveða á um brot af því tagi sem fréttastofan hefur búið til né um refsiábygð sem menn eins og ég eiga að hafa sloppið undan.

Fjármunir frá Samson ehf. fluttir milli félaga vegna nýrra fjárfestinga

Thu, 14 Jan 2010 08:21:00 +0000

Fjölmiðlar hafa síðustu daga fjallað um fjárreiður Samson eignarhaldsfélags ehf. þar sem látið er í veðri vaka að óreiða hafi verið í bókhaldi félagsins og einstök viðskipti þess við önnur félög í eigu sömu eigenda hafi verið óeðlileg. Þessu er alfarið hafnað. Vegna þessara frétta vilja fyrrum eigendur félagsins koma á framfæri eftirfarandi upplýsingum: